​Мыктыбек Абдылдаев: Жогорку Кеңештин кезексиз чукул жыйынын өткөрүп, өлкөбүздү мыйзам нугуна кайтаруу вазыйпасы турат

Жогорку Кеңештин жаңы шайланган төрагасы Мыктыбек Абдылдаев кыргызстандыктарга, саясий партиялардын жетекчилерине кайрылуу жасады.

-5-октябрда Жогорку Кеңешке шайлоолордун алдын ала жыйынтыктары элдик нааразылыктарга алып келип, ошондон бери өлкөбүздөгү кырдаал курч бойдон калууда. Абал өтө оор. Президент Сооронбай Жээнбековдун түндө кырдаал турукташкандан кийин кызматтан кетүүгө даяр экендигин жарыялаганы оң жылыш деп эсептейбиз. Эми чукул арада Жогорку Кеңештин кезексиз жыйынын өткөрүп, өлкөбүздү мыйзам нугуна кайтарып келүү вазыйпасы турат.

Бул үчүн Жогорку Кеңештин депутаттарына өкмөт башчылык кызматка кызыкдар тараптардын тирешүүсү жана басымынан тышкаркы шарттарда иштөөгө мүмкүнчүлүк түзүлүшү керек. Бийлик кимдин жактоочулары көп болсо, ошол тарапка оошу керек деген түшүнүк менен эмес, Баш мыйзамыбызда жазылгандай, шайлоонун жыйынтыктары аркылуу гана бөлүштүрүлүшү зарыл.

Андыктан, бардыгыңыздарды тез аранын ичинде тарапташтарыңыздарга түшүндүрүү иштерин жүргүзүп, өлкөбүзгө тартип жана тынчтыкты орнотуу керек экенин унутпаңыздар.

Акыркы эки күн ичинде фракция лидерлери жана депутаттык топтор менен болгон сүйлөшүүлөрдө бардык тараптар консенсуска келип, кырдаалдан чыгуу боюнча кандайдыр бир чечим табууга даяр экендигин билдиришти.

Ушул тапта Жогорку Кеңештин жыйынын, коопсуздукту жана депутаттардын эркин ой билдирүү укуктарын сактоо менен өткөрүү абдан маанилүү. Мамлекетибиздин алдында оор сыноолор турат. Элибиздин демейдегидей бейпил жашоо-турмушуна кайтып келүүсүн камсыздап, кышка даярдык көрүү, экономиканы жандандыруу, пандемиянын экинчи толкунуна даярдануу чакырыктары турат.

Булардын бардыгы мамлекетибиздин ичиндеги ынтымак жана тынчтыкты бекем сактоого байланыштуу болот. Өлкөбүздүн бүтүндүгү жана элибиздин бейпил жашоосу үчүн ар бириңиздерди саясий амбицияларды кое туруп, биримдикке келүүңүздөрдү өтүнөм, -деп айтылат кайрылууда.

4-октябрда өткөн шайлоонун жыйынтыгына нааразы болгон партиялар 5-октябрда Бишкекте митингге чыгып, анын аягы башаламандыкка айланган. 6-октябрга караган түнү митингчилер парламент менен президенттик аппараттын имаратын, УКМКны ээлеп, камактагы бир топ саясатчыларды бошоткон. Окуялардын натыйжасында Борбордук шайлоо комиссиясы акыркы парламенттик шайлоонун жыйынтыктарын жараксыз деп тапкан.

6-октябрда Жогорку Кеңештин алтынчы чакырылышынын депутаттары эки топ болуп, эки башка жыйын курушкан. “Достук” мейманканасынын жыйындар залына чогулган депутаттар тобу Мыктыбек Абдылдаевди Жогорку Кеңештин төрагасы кылып шайлашкан.

Сүрөт: Интернет булактарынан.

Муну бөлүшүү
Биздин иликтөөлөрдү колдоп, коррупция менен күрөшүүгө салым кошуңуз!

Окшош жаңылыктар

Журналисттик иликтөөлөр

Помочь проекту

договором оферты