Кыргызстан Тажикстан менен чек арасындагы бир постту жабууну пландап жатат

  • 4 года мурун

Кыргызстан Тажикстан менен чек арасындагы бир өткөрмө бекетин жабуу маселесин караштырып жатат.

Бул тууралуу 12-майда Жогорку Кеңеште маалымат берген вице-премьер-министр Акрам Мадумаров билдирди.

Ал депутат Таабалды Тиллаевдин суроосуна жооп берип жатып «тажик тарап сүйлөшүүгө келбей койду» деп айтуу туура эмес болорун, экономикалык ыкманы колдонуп, чек араны жапса кыргыз тарап өз жарандарына көбүрөөк зыян келтирип аларын, бирок бир пост боюнча маселе каралып жатканын айтты:

«Экономикалык рычагдын убактысын биз өткөрүп жибердик. Муну ачык айтышыбыз керек. Өзбекстан менен Тажикстандын ортосундагы экономикалык алака жакшы болуп, азыр ортосунда 16 чек ара өткөрмө пункту иштеп жатат. Бирок Согди облусу боюнча кандайдыр бир деңгээлде бизге көз карандылык бар. 2-3 күндө «Кайрагач» постун толук жапканга барабыз. Алар өзүлөрү да коронавируска байланыштуу кат жөнөткөн. Азыр бир постту жапканга барабыз, бирок «Кызыл-Белди» толук жапканды эл аралык нормаларга ылайык карашыбыз керек».

Депутат Тиллаев кыргыз өкмөтүнүн чек ара маселелери боюнча ишин сынга алып, Тажикстан менен чек араны жабууну сунуш кылган:

«Биздин кошуналар көнбөсө, анда биз чечкиндүү кадамдарга баралы. Товар жүгүртүү бир жылда болгону 27 млн. доллар болду. Анын 18% гана Тажикстанга импорт. Аны түшүнбөсө, менин сунушум – чечкиндүү кадамдарга баралы. Чек араны толук жабалы. Сүйлөшүүлөр бүткүчө бир жылбы, эки жылбы, шылтоо айта бербей, конкреттүү кадамга баралы. Же Тажикстандан бир нерсе күтүп жатабызбы?».

8-майда Баткенде чек ара окуясында жарадар болгон үч жоокер 10-майда атайын тик учак менен Бишкекке жеткирилген. Үчөө тең Улуттук госпиталга жаткырылган. Көкүрөгүнө ок тийген экөөнүн абалы канааттандырарлык экени, ал эмиомурткасына ок тийген аскердин абалы оор экени, ал реанимацияда жатканы кабарланган.

Тажик тарап бул окуядан эки жараны жараат алганын билдирген.

Сүрөт: «Азаттык»

Муну бөлүшүү

Окшош жаңылыктар

Журналисттик иликтөөлөр

Помочь проекту

договором оферты