Бишкекте коронавирусту чет өлкөдөн жугузуп келгендер жуктурууда
- 4 года мурун
4-майдагы маалымат боюнча, Кыргызстанда коронавируска чалдыккан 35 учур катталса, анын 25и Бишкек шаарынан чыккан. Борбордо инфекция жугузуп алгандардын арасында чет өлкөдөн келген үй-бүлө мүчөсүнөн жуктуруп алгандар арбын.
-Бишкекте 4-майга карата COVID-19 илдетке чалдыккандардын жалпы саны 231 адамды түздү. Алардын ичинен, чет өлкөдөн келген жарандар — 34, жергиликтүү жарандар — 197. Медициналык көзөмөлдөгү байланышта болгон жактардын саны – 194, — деп билдирди Бишкектин вице-мэри Татьяна Кузнецова.
17-апрелде Кыргызстанга чартердик каттам менен 1117 жүргүнчү келген, алардын баарынан ПЧР-анализдери алынган. Анкара, Стамбул, Екатеринбург, Дубайдан келген 5 жарандан коронавирус инфекциясы аныкталып, бардыгы ооруканага жаткырылганын коомдук саламаттыкты сактоо башкармалыгынын жетекчиси Айнура Акматова айтты.
Чет өлкөдөн келгендер экспресс-тест, ПЦР тест тапшырат, анын жыйынтыгы чыкканча 3 күн обсервацияга жаткырылат. 3 күндө анализи таза чыкса, симптомдор жок болсо алар үйүнө жөнөтүлөт.
Мына ошол чет өлкөдөн жугузгандар үй-бүлө мүчөлөрүнө да жугузуп жаткан учур аз эмес экендигин республикалык штаб билдирди.
-Бишкекте коронавируска чалдыккан 231 бейтаптын ичинен 190 адам шаардык каттоодогу дарек боюнча жашайт, 41 адамдын каттоосу башка шаарларда.
Алардын арасынан 69 киши 16 калктуу конушта турат, — деп билдирди Бишкектин вице-мэри Кузнецова.
Анын айтымында, COVID-19 вирусун жуктургандардын көбү — Ленин районунда.
Ленин районунда – 82, Октябрь районунда – 45, Биринчи май районунда – 41, Свердлов районунда – 21 киши.
4-майда бир суткада COVID-19 инфекциясынын жаңы 35 учуру катталып, жалпы саны 830га жетти.
Сүрөттө: Бишкек шаарынын вице-мэри Татьяна Кузнецова. Республикалык штаб.