​Нарындын Кеңеш айылында контейнерде окуган окуучулар башка имаратка көчүрүлөт

Нарын облусунун Нарын районунун Кеңеш айылында контейнерден куралган жайда окуган окуучулар суук түшкөнчө башка имаратка көчүрүлүп, ал жактан окуусун улантат.

Бул тууралуу вице-премьер-министр Алтынай Өмүрбекованын Нарын облусуна жумуш сапары учурунда айтылды.

Имаратты билим берүү багытына өзгөртүү үчүн тиешелүү акча каражат каралды. Анда оңдоп-түздөө иштери жүрүүдө.

Жакын арада Кеңеш айылына жаңы мектеп куруу иштери башталат, анын долбоордук-сметалык документтери даяр.

Кеңеш айылындагы мектептин эки окуу корпусу бар, анын бирөө авариялык абалда, ал эми экинчисинде балдар билим алууда.

Кеңеш айылындагы окуучулардын контейнерде окуп жатышы коомчулукта чоң талкууну жаратып, 4-сентябрда билим берүү жана илим министри Гүлмира Кудайбердиева өзү берген арызынын негизинде кызматтан кеткен. Нарындын губернатору Аманбай Кайыпов отставкага кеткен.

Кийинчерээк өкмөт Кеңеште жаңы мектеп куруу пландалып жатканын билдирген.

Сүрөт: Интернет булактарынан.